د کوزوو مسلمانو ښځو د رمضان په دودیزو فعالیتونو کې پراخه ونډه
ایکنا نیوز د «مسلمون حول العالم» ویبپاڼې په حواله راپور راکوي، د کوزوو د اسلامي ټولنې د ښځو څانګه د دیني پوهاوي د پیاوړتیا او د اسلامي ارزښتونو د خپرولو په موخې سره، په ټول هېواد کې په ښارونو او کلو کې د روژې د مبارکې میاشتې د چمتووالي لپاره پراخ دیني او تعلیمي فعالیتونه ترسره کوي. په دغو فعالیتونو کې د پوهاوي ویناوې، د قرآن کریم تلاوت، او د ښځو او ماشومانو لپاره تعلیمي پروګرامونه شامل دي چې په جوماتونو او ښوونیزو مرکزونو کې ترسره کېږي.
د کوزوو د اسلامي ټولنې د ښځو څانګې ښوونکې د دغو فعالیتونو د مستقیمې رهبرئاو تنظیم له لارې خپل مهم رول د اسلامي زده کړو د بنسټ په توګه ثابتوي او د داسې نوي نسل په روزنې کې دوامدار تاریخي رول ادا کوي چې د خپلو اسلامي ارزښتونو په اړه لا ډېر پوهاوی او ژمنتیا ولري، په ځانګړې توګه د روژې د مبارکې میاشتې د چمتووالي په دې بهیر کې.
د وشتري ښار پروګرام
په وشتري ښار کې، چې د کوزوو په شمال کې موقعیت لري، د روژې د مبارکې میاشتې د رارسیدو په مناسبت د ښځو ادارې په بوکوشیت جومات کې یو دیني پروګرام جوړ کړ. دا پروګرام د قرآن کریم په تلاوت سره پیل شو، وروسته ښوونکې آربنورا فاتووچي د حاضرینو هرکلي وکړ.
د حجاب خوږه تجروبه!
په دې پروګرام کې د جومات د نجونو زده کوونکو له خوا دیني سرودونه او تعلیمي وړاندېزونه هم شامل وو. تر ټولو اغېزمنه شېبه هغه وه چې درو نجونو د لومړي ځل لپاره د حجاب اغوستلو خپله ژمنتیا اعلان کړه.
د راهووتس ښار سمینار
په لویدیځي کوزوو کې د راهووتس ښار د اسلامي ټولنې د ښځو څانګې یو دیني سمینار جوړ کړ چې پکې پروفیسوره واجده بنیاکو ګډون درلود. دا سمینار د روژې د اهمیت او احکامو د پوهاوي د زیاتوالي په موخه د مقدماتي پروګرامونو په چوکاټ کې ترسره شو.
پروفیسوره واجده بنیاکو د روژې د فضیلتونو او ورته د چمتووالي پر اهمیت خبرې وکړې، د روژې اړوند اسلامي احکام ئې بیان کړل او د کورنۍ په چمتو کولو او د دیني ارزښتونو په پیاوړتیا کې یې د ښځو پر رول ټینګار وکړ.
د قرآني الفبا جشن
په پلازمېنې پریشتینا کې، د کوزوو د اسلامي ټولنې د ښځو څانګې د ۲۰۲۶ کال د فبرورۍ په ۱۴مه نېټه په داردانیا جومات کې یو جشن جوړ کړ. په دغو مراسمو کې ۲۳ ماشومانو ګډون درلود چې د عربي الفبا زده کړه ئې په بریالیتوب سره بشپړه کړې او د قرآن لوستل ئې پیل کړي وو. دا د هغوی په دیني سفر کې یو مهم تعلیمي پړاو ګڼل کېږي.
په پروګرام کې د قرآن تلاوت، دیني سرودونه او تعلیمي شعرونه شامل وو. د مراسمو په پای کې په ماشومانو سمبولیک ډالۍ او د قرآن نسخې ووېشل شوې څو هغوی لازیاتو زده کړو ته وهڅول شي.
https://iqna.ir/fa/news/4335198
